ةةة.. لسان عيره..ةةة
اممممممم
أنا وشيطانى..وجنانى
وبنت جيرانى ف الصوره
عصفوره تزقزق أوزانى..
وأوزانى ..لوقه ومكسوره
ف الفجر تنقر ف ودانى..
وف قلبى ترقص طنوره !
تخطفنى من بين أحلامى
تودينى الشمس المهجوره
أرسمها بالشوق الحامى..
وكحلها ..كحل السنيوره
والدنيا تغنى ..قدامى ..
يا محنى ديل العصفوره
والقمره تسقف والنجمه..
ف العتمه تنور ع ..القوره
والفرحه تطرح كام ..قمحه
والسبحه تضلل ع البوره..
شيطانى الواطى ..صحانى
بقصيده هبله..ومشعوره!
شعلقنى على كتف خيالى..
وحبالى دايبه..ومقهوره
إدانى قلمى وورقاتى..
وكلماتى زى ..الفريره
ع السطر تجرجر أبياتى..
وسكاتى يجر..المقطوره!
وأشقر على قبلى وبحرى..
وبحرى عايز ..زميره!
والقبلى عاوز سقاله..
وحواله تخبز له ..خميره
وبنت تربى ف لبلابه..
وكتابه..تصفر صفيره
والولد يطلع م الغابه..
والتار البايت..والغيره
البدر يزهر لياليهم..
يجمعهم..صوت التكبيره
وبدنهم يشبع فى وطنهم..
وعيالهم ..تخرج م الحيره
اممممممم
وف بحرى الخلق كتايب
العاصى أفضل م التايب
والخيبه بتعبى زكايب..
والعيبه من غير تأشيره....
اممممممم
فلاحنا طلق..أراضيه
طول مااحنا بنعاند فيه
الباشا ومعاه البيه..
وخلايق ف النتش خبيره...
امممممممم
والصوره ف وش التلفاز
معجونه بهباب على جاز
والعوزه عارفه العواز.!
وحكومه ملهاش ..بزاز
ترضعنا..كله وتعميره...
اممممممم
تسطلنا نهار مع ..ليل
وتطنش حق المساطيل
ويا ويلنا..لو شفنا دليل
يا شيطانى بطل تهويل
واديها سحلب ..وخميره...
اممممممم
لو عشت أصف..وأعيد
وجابولى كام عمر جديد
تتبدل خلق ..ومواعيد
هتلاقوا ف الفصحه شهيد
أبو سمعه.. ولسانه العيره....!
*******
ابراهيم القاضى..2008/6/3
ليست هناك تعليقات:
إرسال تعليق